قصيدة الجرح المنوسر/للرائعة سعادة عبدالرحمن

اثنين ان ختنك في المحن ماتبالي
رفق الدون واطماع النفس في المالي
ترديك في الهوان وان كان مقامك عالي
والاتنين خصم من صالح الاعمالي

واتنين لا تصغر نفسك اتحاشاها
سيرة الناس وان كان الخشوم لايكاها
الموقدلو نار يوم بكره بتوطاها
والجابلك خبار الناس اكيد اداها

والجرح المنوسر ما بتطبو الكيه
وماببرد حشى الحروقه قولة احيه
علا الليل بطيب خاطر المأذيه
باعك واشتراك زولا غفرك سيئه

والتجى من بعيد قسمتنا نتلاقاها
حار الشينه من الليك كان سواها
لابتقدر تصل حدا تلزمو ياها
ولا بداوي الزمن جرحك ولا بتنساها

والماساتروا الله كضبته ما بستروا
الزول ان ختيت فيهو المروه اختروا
الظفر ان نقح صح البدن في بترو
دربك اعوج ان قبلك كبارك عترو

وحذر وش منافق ببشاشه يقلدك
وحين تديو قفاك بسياط لسانو يجلدك
ماتأمن عدوك ما حك جلد ظفرك
نسبك للوراك صحيح ابوك الولدك

والليك ان عدوك بتختوا في ود عينك
الناس ما تياب كيفنها اصابعينك
مهما انت بازل ما بتسدد دينك
ترجع لمراح العرجا والله يعينك

وزول ان ملكت امرك كان غلط ما تلوموا
وماتعشم صغير بيك يكبر كوموا
الزول الصميم بحكمه داوى هموموا
ما تستنى لقسم البقوم من نوموا